Auguri a tutte le mamme del mondo e a quella mia che festeggia in cielo.
Il corpo muore ma l’ anima resta perenne!
MAMMA
Nc’è sulu na parola
ca teni nta lu cori
e ti ccumpagna sempri,
fin’a chi tu non mori.
E’ na parola duci,
chi duna sul’amuri,
pe quantu spertu vai,
la senti a tutti l’uri.
E’ culurata d’oru,
è simbulu di paci,
ti jinchi di caluri,
nta ment’i tutti staci.
E’ sentimentu grandi
di gnuri e di viḍḍani,
dill’omini di leggi
e dill’ergastulani.
Non ndavi nuḍḍu prezzu
chi poi limosinari,
non esti na parola
chi si poti ccattari.
Nte jorna du bisognu,
la chiami sempri paru,
nta li mumenti scuri,
nci cerchi nu riparu.
E’ na parola sacra
ca sempri la nnomavi,
quandu tu figghjoleḍḍu,
nta iḍḍa ti ḍḍattavi.
E si la bucca, aimía,
finìu pe mmi la dici,
u cori toi diveni,
cchjú niru di la pici.
E’ na parola vera,
c’a mmia mi piaci assai,
u nomu soi è mamma:
non tu sperdìri mai!
Rocco Criseo
